Chësta mostra dess pité na vijiun tlera dla situaziun de Südtirol ti agn 1960 y de süa storia dal 1918 inant. Chisc agn di momënc clou dl „conflit de Südtirol“ pita dër tröc punc d’odüda, y porchël dessel dantadöt gní descedé l’interes por i avenimënc da inlaota.

Tl zënter ciafon chës porsones che s’â „sacrifiché por la liberté“, i ativisć y simpatisanc dl „Movimënt de liberaziun de Südtirol“ („Befreiungsausschuss Südtirol – BAS“) y le svilup straordinar dl „conflit de Südtirol“ che á porté ala „secunda convenziun por l’autonomia“.

Lapró dessel ince gní ponsé a dötes chës porsones che é instësses deventades vitimes ti agn dl „conflit de Südtirol“.

L “Südtirol-cunflit” fova unì a se l dé canche la Talia ova tëut ite Südtirol do la Prima Gran Viera de nuvëmber dl 1918 y canche l fascism fova ruvà al pudëi tla Talia l ann 1922. I pruvedimënc dl guviern fascist sota Benito Mussolini per la “talianisazion” de Südtirol y la “maiurisazion” tres l fé ruvé adalerch gran cumpëides de zitadins talians, coche nce la “Opzion” marciadeda ora danter Hitler y Mussolini, ova purtà la populazion de rujeneda tudëscia de Südtirol te na situazion da spavënt ncherscëula.

Do la Segonda Gran Viera fova la Talia jita inant cun la politica de “maiurisazion”, che ova purtà dl 1957 ala ancunteda di südtirolesc sun l Ciastel Sigmundskron y ala nasciuda dl “Befreiungsausschuss Südtirol-BAS”.

Dal 1956 inant se ovel abinà ntëur a Sepp Kerschbaumer de Frangart, daujin a Bulsan, südtirolesc de uni età, per se lascé su contra la situazion for plu ncherscëula dla populazion de rujeneda tudëscia. Belau tl medem tëmp univel metù su te Nordtirol na grupa dl “BAS” cun leprò nce persones de d’autri raions de Österreich y dl Deutschland. La feter de n dut cin grupes de persones dl “BAS” ova mé puec cuntac danter ëiles, tan plu che i cumëmbri fajova pert de minonghes politiches y ideologiches desvalives. Duc i BAS-ativisć fova liei dala ulentà de arjonjer zeche per miuré la situazion dla populazion de rujeneda tudëscia de Südtirol; duc fova njeniei per n “sacrifize per la lidëza”. Chësc, scebën che l fova stat tosc tler, che la Talia ëssa reagì cun represcions y persecuzions contra i BAS-ativisć. Do la assassineda dl BAS-ativist Luis Amplatz fovel tler, che elemënc dl Stat talian ne se ëssa nianca lascià sciautrì ju dan la mort.

Resistënza politica

I prim BAS-ativisć purvova bele dal 1957 incà de mëter sun mëisa, cun azions de resistënza, i problemes dla populazion de rujeneda tudëscia.

L univa partì ora julantins y dantaldut tacà ora la bandiera de Tirol. Sëuraprò univel depënt sun i parëies di crëps l’Eguia y l blason de Tirol.

Chisc simboi, de gran senificat per i südtirolesc, fova pruibii dal tëmp dl fascism. Nce do la Segonda Gran Viera univa la adurvanza de chisc simboi straufeda te na maniera sciorfa!

Atentac

Do che l Senat dla Talia ova dat pro la lege nueva sun la zitadinanza, che ti dajova al Stat l mesun de ti la tò cun mesures aministratives a chëla persones che ne desmustrova nia fedeltà a si istituzions, coche l fova bele stat per i optanc per Deutschland che fova ruvei inò a cësa, se ova 10 reprejentanc dl “BAS” de Nordtirol y Südtirol urtà ai 1 de juni 1961 a Zernez tla Svizra. Iló iel unì fat ora de scumencé cun la resistënza, fajan atentac contra simboi dl pudëi dl Stat, la colonisazion y la politica de imigrazion, cialan de stravardé for la vita dla persones. L ie nce unì fat ora can mëter man.

Al plu tert do l 1964 ne se an nia plu tenì a chësta regula do che l fova unì malterjà i BAS-ativisć y mazà Luis Amplatz, d’autri ativisć y persones che ne tucova nia leprò. N ruvova sëura for de manco chi che fova de gauja di atentac sun persones y al plu tert dal 1964 inant ne pudoven nia strité ju na respunsabltà dl servisc sucrët talian. Tres chësta “strategia dla tenscion” dassova i ativisć unii screditei y metui da na pert. Nce Österreich univa metù sota druch.

Dal 1961 incà ova neofascisć talians fat atentac sun persones te Österreich. Chëi che fova de gauja ne n’ie mei unii straufei.

Dlongia al patimënt uman y al sacrifize di ani sessanta dl secul passà ova l “Südtirol-cunflit” nce cunseguënzes diretes: la Talia renfurzova bele dassënn dal 1950 incà y pona dantaldut do la “Nuet di Fuesc” si forzes de segurëza te Südtirol cun saudeies, carabinieres, la verdia de finanza y forzes de polizai de ades 40.000 persones. Südtirol semiova a n ciamp de saudeies.

Nce Österreich renfurzova si cuntrol dl cunfin, dantaldut pervia dla prescion politica dla Talia tres la “Konzentrierte Abteilung” dla jandarmeria y dl 1967, do i fac sun la Porzerscharte, cun l militer sun l cunfin.

Positiva per Südtirol y, ala fin di conc nce per la Talia, ie stata la soluzion de stlù ju l “Paket” tl ann 1969 che à purtà al “Segondo Statut de autonomia” tl 1972.

Ti ani sessanta dl secul passà fovel mort almanco 35 persones tl “Südtirol-cunflit” y truepes fova unides ferides. Chësta persones ie mortes per rejons deferëntes. Scebën che l ti vën dat la gauja dla mort de alpini, carabinieres, dla verdia de finanza y dla polizai al “BAS”, ie la majera pert di atentac contra la forzes de segurëza talianes mo al didancuei nia unic stlarii. Danz fova mpo mo n valgun BAS-ativisć unii cundanei tla Talia nce per fac ulache i ne n’ova nia gaujes. Na amnestia o reabilitazion vën ncuei mo refudeda dala Talia.