Lecort y duvier

Chësta mostra de storia de al didancuei documentea i avenimënc di ani sessanta dl secul passà te Südtirol. Te chëi tëmps ulova la politica romana arjonjer te na maniera tlera cun la imigrazion y snazionalisazion che la populazion tudëscia y ladina de maiuranza te Südtirol devënte na mendranza zënza dërc y zënza identità.

L plan fova ruvà a si pont plu critich canche l Senat de Roma ova dat pro ai 27 de auril dl 1961 na lege per ti tò la zitadinanza taliana a truep südtirolesc y nsci fossel stat mesun tuché na gran cumpëida de persones che n ulova tò y jì.

Dan che la Majon di deputac ova pudù cunfermé chësta lege scandalëusa, se arlevova dal instà 1961 inant n muvimënt de resistënza per fermé chësta politica fascista. L “Befreiungsausschuss Südtirol-BAS” ulova mustré al mond cun atentac de prutesta dantaldut contra pei dla lectrisc che la situazion ne fova  nia plu da tenì ora te Südtirol.

Purtruep fovel da tramedoi pertes morc. Nce de d’ëi ne daussen nia se desmincë.

La mostra ne n’uel dessegur nia udëi sciche ideal la viulënza o l terorism. La mostra su plu che auter, tan inant che n popul possa ruvé, sce l vën sotmetù. De chësta mostra ie perchël la fotos, i pec persunei di cumbatënc per la lidëza sciche nce la tecniches scëmples adurvedes per fé sauté tl’aria n amunimënt acioche i fac suzedui per gauja dla politica fauza dla Talia ne suzede mei plu tl cuer d’Europa.

L Südtiroler Heimatbund (SHB) fova unì metù su dl 1974 da perjunieres politics da ntlëuta. Si duvier ie lecurdé i meric, la pëines y i sacrifizies di perseghitei y de si families. Chësta mostra dëssa vester n sëni de chël che fova suzedù.

L Südtiroler Heimatbund (SHB) ti sënt gra al sëurastant de unëur Sepp Mitterhofer y ai truep d’autri cumbatënc per la lidëza, a si parënc y ala truepa persones privates per avëi metù a despusizion i pec metui ora tla mostra. Die Ve l paie!

Roland Lang
Sëurastant dl Südtiroler Heimatbund