Servijes sucrëc, gladisć, neofascisć

Do la “Nuet di Fuesc” fovel unì adalerch te Südtirol persones da ti avëi puecia crëta, che cialova de se fé ntëur ite pra i südtirolesc y che i dajova pona sëura pra i carabinieres. A chësta maniera fovel ruvà te perjon y unì malterjà nce persones che ne ne n’ova nët nia da nfé cun i fac.

Ai prims de agost dl 1961 fovel ruvà te Sarntal l “SS-Oberscharführer” de n iede Robert Henckelmann, contra chël che l ti univa jit do dala sunieria te Deutschland per avëi mazà l ann 1944 lauranc da oradecà. L fova stat bon de se n mucé tla Talia y fova atif te Südtirol cun l inuem fauz “Franco Spinelli”. Ël laurova per l servisc sucrët talian. L ova cialà de cunvëncer i paures de se mëter a despusizion per na rebelion. Daldò fovel sparì. I carabinieres fova ruvei adalerch y ova śarà via 22 persones. L bacan dl luech “Agrater” Johann Thaler fova restà per belau trëi ani zënza gauja te perjon y fova permò unì detlarà inuzënt te n pruzes tla segonda istanza. Ël y si trëi mutons fova unii malterjei burt do che i fova unii piei.

Feter la medema funzion ova nce abù Anton Stötter de Augsburg che fova stat dant n criminel y n agënt dla NS. Ël abinova adum sun ncëria dl servisc sucrët talian SIFAR a Tramin y tl raion ntëurvia inuemes de patrioc südtirolesc. Chisc ne n’ova la gran pert nët nia da nfé cun l “Befreiungsausschuss Südtirol-BAS”. I śarei via, fova unii da stramp malterjei.

Mazeda sun ncëria ascunduda

Dal fé atentac de provocazion, al ruvé sun l scialier plu aut: l mazé, bastovel puech. Christoph Franceschini ova abinà ora coche l agënt talian Christian Kerbler, che univa da Österreich, ova mazà sun ncëria ai 7 de setëmber 1964 Luis Amplatz cun n’erma de servisc di carabinieres che ti fova unida metuda a despusizion. N ova ulù fé miné che l fossa stat n stlupetamënt danter i carabinieres y i doi teroriśc dl Südtirol, Amplatz y Georg (“Jörg”) Klotz y che i doi fossa pona morc. L plan ascundù ne fova nia garatà, davia che Klotz, che ëssa nce messù murì, fova ntant sce stat bon, scialdi ferì, de mucé te Österreich.

Na bomba tl express dl Prëner

Ai 15 de nuvëmber 1964 ova giapà l’autoriteies talianes la informazion che sun l express dl Prëner dassovel vester na bomba te n vagon dai cufri. La ferata fova unida fata jì sun scines secunderes a Persenon, ulache l vagon bele destacà fova puech do sautà tl aier. Te Österreich ova la polizai śarà via l tudësch Karl Franz Joosten, che ova dit de vester n amich de Südtirol y che stajova a fit pra la familia Felder a Absam. Chësta familia ti ova dat nce n cuatier al cumbatënt per la lidëza südtirolesc Georg Klotz. Ël fova per curt tëmp unì pià y Joosten ova sun chëla tëut un de si cufri cun si inuem lessù y ova metù ite esplojif y n njin cun timer per fé sauté dut. Pona ovel dat su l cufer a Dispruch cun l express dl Prëner che furnova tla Talia.

Tl 1965 fova Joosten unì cundanà per chësc fat da na sunieria de Österreich a 18 mënsc de perjon. La nrescides di deputac Boato y Bertoldi tl Parlamënt talian mustrova su che Joosten ova fat chësc sun ncëria dl reprejentant plu aut dla polizai te Südtirol, l cuestor Alitto Bonanno, per descedé ora danter la jënt refudanza y sdëni contra i BAS-ativisć. Chisc dassova unii metui dant ala jënt coche assassins defin zënza cuscienza.

Bomba de provocazion te na cësa taliana

Per descedé ora danter la jënt sdëni contra i Südtirol-ativisć ova l agënt talian Robert Kranzer de Klobenstein metù ju te na cësa de talians material esplojif nia adatà a sauté tl aier. Chësc fova pona unì abinà, ai 20 de mei 1965, dai carabinieres canche l fova iló nce reprejentanc di media. L spetacul dassova demustré che i cumabatënc per la lidëza de Südtirol fova assassins.

I avenimënc sun la Porzescharte

Dut chësc fova piculëzes n cunfront al atentat che dassova vester suzedù sun la Porzescharte, che ova purtà pro che la relazions danter la Talia y Österreich arjunjësse l pont plu bas. Sun la Porzescharte dëssa ai 25 de juni 1967 – aldò dla verscion ufiziela taliana che Österreich ova sëurantëut zënza dì velch de contra – vester morc cater saudeies talians per gauja de na trapula de esplojif. Atëur dëssa vester stat Peter Kienesberger che fova bele cunesciù per d’autra azions fates deberieda cun l BAS. Deberieda cun l dutor dut. Erhard Hartung y l saudé dl militer de Österreich Egon Kufner dëssel vester unì udù tla nuet dai 24 ai 25 juni 1967 nia dalonc dal luech di fac. Te n pruzes fat contra d’ëi y d’autri a Firënza fova Kienesberger y Hartung unii cundanei ala perjon a vita y Kufner a 24 ani de perjon. La sentënzes fova unides cunedides zënza che i acusei fova iló y ova coche fundamënta leges di tëmps dl fascism talian. Les ie nchina śën mo n droa.

I trëi fova ntant sce unii detlarei inuzënc ai 18 de mei 1971 te Österreich. L publich minister fova stat bon de scumencé mo n iede l pruzes, ma pona fovel unì, sun sburdla dl Minister per la giustizia de chëi tëmps Christian Broda (SPÖ), stlut ju dal presidënt dla Republica Rudolf Kirchschläger do la detlarazion de inuzënza de mei dl 1975. La detlarazion de inuzënza bele cunedida dant – contra duc i sforc dl publich minister de purté la proves de gauja di autëures – ova si fundamënta sun l prim argumënt dla defenduda, da liejer do te n bënsté aldò de chël che l atentat ne pudova nia unì fat ti tëmps udui dant. Tres n diagram de destanza-tëmp purtà dant, foven stac boni de cunvëncer la majera pert dla chëurt de se tenì ala regula “in dubio pro reo”.

Passenea avisa pra la strategia dla tenscions

Hubert Speckner ova desmustrà, do ani de nrescides fates cialan do a d’uni sort de documënc nchina iló nia cunesciui te Österreich, che l atentat sun la Porzescharte ne pudova nia vester stat n tel. Coche d’autri caji dubiëusc, ulache n ti ova dat la gauja per la problematica de Südtirol al BAS, ie chësc stat n aspet che fajova pert dla “strategia dla tenscion”.

Cun la “strategia dla tenscion” ulova cërtli che fajova cumploc – urganisei te unions sucrëtes neofascistes coche “Ordine nuovo” o “Avanguardia Nazionale”, ma nravisei nce te pertes di servijes sucrëc SIFAR, SID y SISMI, sciche nce dla rë militera sucrëta “Gladio” – sfurzé su cun informazions planifichedes n mudamënt tla Talia per mëter su n rejim autoriter. L plan ne n’ie per fertuna nia garatà.

Per servijes sucrëc y de segurëza che lëura n ascundon toca l lauré de sucrët y l ngiané pra si lëur. Ëi lëura te n ciamp grisc, curii dal “nteres de Stat”, y passa sëura uni rëm leghel ora che perdrët ne manciova nia tla Talia democratica. Curii da sëura ju univa i talians che ova malterjà te Südtirol y che ova dan si vitimes for dat da ntënder de avëi “carta bianca” y “mani libere”. Chësc fova stat ti tëmps canche Mario Scelba fova Minister dl intern. Per chisc servijes jivela de stravardé identiteies fauzes, de ascuender i drë fins, de cospirazion, pruvocazion y dantaldut de dé dant fac fauc o de i ascuender.

A chësta maniera ne fovel nia da schivé che n valgun atentac o tentatifs de atentac unisse a se l dé sota “na fauza bandiera”. I autëures ova da arjonjer pra chësta azions i fins che i se ova tëut dant y ne metova nia a verda a perdudes. Sce da una pert fova l fin di servijes sucrëc talians chël de scredité i cumbatënc per la lidëza südtirolesc, tres atentac simulei, nia zënza che i respunsabli politics l ëssa sapù, dat pro o cumandà, per fé prescion politica sun Österreich, pona fovel mo persones che fova leprò y nce a cë dla rë “Gladio”. Chëstes ova, deberieda ala uniteies sucrëtes “stay-behind” talianes, n nteres de sené tenscion, de nuzé y strumentalisé la azions te Südtirol y mëter a jì nsci si plan de suverscion. Cun la “strategia dla tenscion” iel unì fat nsci nia puec atentac y tentatifs de atentac da maladët.

N curt zeche sun “Gladio”

“Gladio” (tal., dal lat. gladius “speda”) fova na pert dla urganisazion sucrëta paramilitera “stay-behind” dla NATO, dla CIA y dl MI6 nglëisc ntan la viera frëida. I cumëmbri de “Gladio” daussova do na nvajion sovietica tl’Europa dl vest fé uperazions de guerilla y sabotajes. La urganisazion fova resteda mpe dal 1950 nchin almanco al 1990 (tl’Europa dl vest, tla Grecia y tla Turchia).

“Gladio” fova tl prim mé l inuem sucrët dla sezion taliana dla rë “stay-behind” europeica. Do la descurida dla urganisazion sucrëta, dl 1990, fovel unì dat l inuem a duta la rë y nsci a duta la pertes de urganisazion nazioneles che ova te uni Stat n inuem sucrët defrënt. Meneda univa chësta dai servijes sucrëc naziunei.

Do la descurida dla urganisazion ne n’ova la NATO nia dat ju na tëuta de posizion y l’ova dit che de prinzip ne fajovela deguna detlarazions sun “cuestions militeres sucrëtes”.

L simbol de “Gladio”

L storich Daniele Ganser scrijova n cont dla rejons de chësta strategia: „La jënt, l Parlamënt y la majera pert di cumëmbri dl Guviern ne cunesciova nia la armedes ‘stay-behind’ [nota: la rë ‘Gladio’]. Te duta l’Europa dl vest fovel unì metù su na rë de segurëza coordineda y sucrëta, nia da udëi. Te n valgun stac, ma nia te duc, ie chësta rë de segurëza nce deventeda na urganisazion de grupes teroristiches. […] Washington, London y l servisc sucrët militer talian se temova che sce i comunisć fossa ruvei al Guviern [talian], fossa la NATO unida da dedite plu dëibla. Per se stravardé da chësc fova l popul unì manipulà: terorisć radicai de man drëta fajova atentac. De chisc ti univel cun ngianedes dat la gauja ai nemics politics y la populazion se damandova deplù polizai, de strënjer ite i dërc de lidëza y deplù cuntrol tres i servijes sucrëc”.

Grupes neofascistes talianes

Un di atentac plu spetaculeres dla segonda Republica fova unì fat ai 23 de setëmber 1963 a Ebensee. Cun na prima bomba fovel unì desdrù puech do la sies daduman l monumënt

“Steinernes-Löwen-Denkmal” sun la streda dl lech Traunsee. Puech do ova chël che furnova pea tla cabina dla furnadoia dl Feuerkogel abinà mo na bomba sun si tët. La cabina fova plëina de sculeies, ma per fertuna oven pudù la fermé y tò demez l esplojif per tëmp y ëura. Na terza cëria, che fova unida metuda pra n cuntenidëur dla salines de Ebensee, fova purtruep sauteda tl aier canche n ova purvà de la tò demez. Nsci fovel mort n dependënt dl cumando de jandarmeria de Linz y ot jandarms, n publich minister, n giudesc, sciche nce na scrivana dla sunieria dl raion de Gmunden fova unii ferii. Na cuarta y cuinta bomba ne fova nia sautedes tl aier. Duc i indizies purtova de viers dla Talia: l esplojif adurvà de usanza dala NATO univa dala Talia, sciche nce l timer per fé sauté la cëria. La medema sort de njin fova unì tëut ca ai prim de utober 1961 pra l atentat al monumënt de Andreas Hofer sun l Bergisel. Chësc pudova unì nterpretà sciche prim ndiz da pert taliana che i atentac ne univa nia mé fac te Südtirol. Testemonesc se lecurdova de avëi udù n Fiat cun targa de Verona y sun i luesc dl fat fovel unì abinà documënc dla lia di studënc neofascista “Associazione Studentesca di Azione Nazionale (A.S.A.N )” cun l stempl “I carabinieri non si toccano” (“I carabinieres ne daussa nia unì tuchei”).

Coche l fova unì ora daldò, fova nce l atentat, che n ova purvà de fé al “monumënt n unëur di saudeies tumei dla armeda sovietica per delibré Österreich dal fascism”, sun la plaza Schwarzenberg a Viena, unì fat ala medema maniera. Sun l pustamënt dovia dl “monumënt ai rusc”, coche l univa numinà dala jënt, fovel unì abinà ntëur mesdì dl 18 de agost 1962 a cater cin metri de autëza, na tascia de lin brum, cun i ëures cujii cun plastica blancia, coche les ie inò de moda al didancuei, da purté cun n ciol blanch de pel cun carabineri da tramedoi pertes. Cun d’autri funziuneres auc fova debota ruvà sun l post nce l ufezier Alois Massak, espert de esplojifs dla direzion dla polizai de Viena, che dassova avëi abù plu tert pra l fat sun la Porzescharte, na funzion particulera. Do avëi fat la ispezion dla tascia fovel ruvà ala cuntlujion che l se tratova de na “mascin dl diaul”. Massak fova stat bon de taië i fii, che liova l timer al njin per fé sauté. L timer fova tacà ite a zirca cin chilo de TNT. L njin fossa sautà tl aier ntëur la cinch domesdì. Cun la nrescides foven ruvei ala cuntlujion che l fova liams cun l’esplojion pra l monumënt de Andres Hofer sun l Bergisel dl ann dant. Tlo fovel unì adurvà l medem timer. N auter liam fova nce l tentatif de atentat de Viena, canche n ova abinà esplojif te Osttirol de juni 1962. Tla tascia fovel n pruspet cun la scrita “Plazes da camping y albiercs di jëuni a Viena” y daujin al monumënt oven abinà l sëni per unì sëura chi che fova i autëures: n pòch de 29 chertes de cumëmbri dla lia di studënc neofascista A.S.A.N. nia scrites ora.

Belau trënta ani do fovel unì ora n ndize tler che nce l servisc sucrët talian dassova avëi respunsablteies n cont dla bombes sun l Ebensee. D’instà dl 1991 ova la polizai abinà da Giancarlo Masiero, n sustenidëur militant dl partit neofascist talian “Movimento Sociale Italiano (MSI)” n “memoriale”, n pert scrit a man y n pert scrit a mascin cun truepa informazions sun l’atività di servijes sucrëc te Südtirol, ulache l MSI ova fat pea. Nsci dassovel vester che i atentac sun la cëses dl politicher dl MSI Andrea Mitolo y dl sëurastant per l raion dla “Democrazia Cristiana (DC)” de jené 1987, fova unii fac dal MSI nstës per avisé la vela de si vieres. La ncëria dassova avëi dat l sëurastant dl partit Gianfranco Fini de persona. Pra la veles dl Parlamënt de juni 1987 fova pona l MSI propi stat bon de giapé plu che trëi iedesc tan de stimes. L cunselier provinziel di Vërc Alexander Langer jagova bele a chëi tëmps (zaita “profil” 1985, sfuei 25) che do i atentac ëssa pudù vester i servijes sucrëc. Ntant sce ova l publich minister de Bulsan stlut ju si nrescides contra Masiero, che detlarova for inò, canche l univa damandà ora, de avëi metù adum si scric scrijan ju n pert da zaites y de avëi nventà l rest.

L “memoriale Masiero”

Ma de chësc dubitoven cun rejon, ajache tl “memoriale Masiero” fovel “na mont de fac mutivei storicamënter y nia informazions genereles cunesciudes”. Masiero nunziova nsci dantaldut l “Ufficio R” (ufize R) dl servisc sucrët talian “Servizio Informazioni Forze Armate (SIFAR)”, tres chël che l univa menà “Gladio”. L ufize fova stat l mediadëur per truepa ancuntedes danter Andrea Mitolo y n general dl’armeda, ajache n se temova da na “nsurezion sciche ai tëmps de Hofer”. L “Ufficio R” fova cunesciù publicamënter permò tl 1991, canche l fova unì su la ntraunides de “Gladio”. Masiero ova ntant sce bele de agost 1990 scrit si “memoriale”, ulache l cuntova plu avisa dl’atività dl “Ufficio R” te Südtirol; nsci de n “magasin de ermes ti tuniei sota l Ciastel de Sigmundskron” che n ova trapinà nzaul d’auter, do che fova sparides ermes y esplojif; de na furmazion per adurvé ermes y esplojif tl’Elpes de Sarntal cun paracadutisć, ulache la majera pert di gladiators ova chësta furmazion militera. Chisc fova sun la lista de 535 inuemes de gladiators che vivova mo ntlëuta. De chisc fac dajova nutizia la stazion radio dla RAI ai 6 de jené 1991. Publicheda iela nce unida per ntier te “La notte dei gladiatori, omissioni e silenzi della Repubblica” (Calusca Edizioni, Padua 1991/92).

Tl “memoriale Masiero” oven abinà sota l titul “ativiteies dla grupa 1961/1968 – atentac” nce te na forma misteriëusa la nota “Albierch per azion Österreich (cajo Poltronieri), mplanc portamont, esplojif y basa a Dispruch, cuatier de firmes cunesciudes che menova adalerch articuli saniteres (Conti Veneziani)”. Aldò dl inuem pudovel mé se traté dl atentat de Ebensee. Sergio Poltronieri fova un di cinch che ova fat l atentat. Per “mplanc portamont” fovel plu dessegur minà la bomba metuda pra la furnadoia dl Feuerkogel. Dala ndicazions de Masiero lijoven nsci te na maniera tlera che i atentac fova unii fac da estremisć de man drëta sun l Ebensee. Nsci fovela nce stata pra l atentat al monumënt de Andreas Hofer a Dispruch, ulache l sustëni per la logistica univa dat dai gladiators atifs te Südtirol. I fii dovia univa trac da uemes dl “Ufficio R” dl SIFAR.

“Liams cun nteresc statei o d’autri abui da “Gladio” y dal servisc sucrët talian, che trajova i fii dl teror, ne possen nia plu strité ju”, ova scrit l archivar de stat Rudolf Jeřábek tla zaita “Öffentliche Sicherheit” (sfuei 1-2, 2006, pl. 42), data ora dal Minister dl intern tudësch (BMI). La zaita “Corriere della Sera” ova scrit plu tert che la azions fova unides cumandedes dal general Giovanni De Lorenzo de persona, per tenì zeruch Österreich da ntervënc te Südtirol.

“Servizi segreti e il segreto di stato”

De Lorenzo ova arjont l pont plu aut de si pudëi: ël cumandova sibe i carabinieres che l servisc sucrët militer SIFAR. Bele de auril 1962 ova De Lorenzo cherdà l ufezier Manlio Capriata, che ova menà per curt tëmp l “Ufficio R”, per ti fé al savëi che l ova mubilisà i cumëmbri südtirolesc de “Gladio”, davia che la mesures metudes a jì contra l teror ne bastova nia y sëuraprò se temovel dassënn dal pericul de na “algerisazion de Südtirol”: “Mi disse che avrebbe attivato gli elementi dell’Alto Adige facendo riferimento ai guastatori gestiti dal Centro e residenti in Alto Adige. Furono attivati in Alto Adige i guastatori addestrati ad Alghero.”

Che chësta grupes fova suvënz ficedes ntan i ani dla bombes te Südtirol, chësc mustrova su nce la nrescides fates da n talian zënza suspet, cun na reputazion auta y i resultac de na nrescida parlamentera a Roma. Ma chisc fac cuncrec ne fova te chëi ani nia de aiut, davia che l pruzes de Firënza ne fova nia unì tëut su inò da nuef; ulache i acusei de Österreich fova unii cundanei ai prim de dezëmber 1971 – zënza vester stac iló y aldò de leges fascistes sotscrites mo da Mussolini. L ne n’ova nce no purtà a tant che la Talia ëssa mudà si pusizion y si valutazion storica y politica sun l Südtirol di ani dla bombes. Per Peppino Zangrando, l presidënt di aucac de Belun, ne fova la “causa Porzescharte”, sun chëla che l ova fat nrescides per ani, defin nia tlera. Aldò de si cunescënzes pudova propi zachei di servijes sucrëc talians y/o cumëmbri dla grupes dant numinedes, ntressedes a cumploc, avëi fat chisc atentac. Ël ne cherdova nia che l fossa stat n atentat dl BAS de Kienesberger, Hartung und Kufner. Nce la lëtra dl BAS, che l cumëmber de Österreich dla cumiscion ing. Massak dassova avëi abinà sun la Porzescharte, fova da unì cunscidreda sciche sce la fossa unida scrita da zachei che ne cunesciova nia massa bën la rujeneda tudëscia. Chësc dijova Zangrando. Tl 1994 ulovel raudlé su da nuef l cajo, ma si dumanda de scumencé da nuef l pruzes fova unida fermeda su dal publich minister.

Ala fin fova l giudesc per la nrescides de Unieja, Felice Casson, tl 1990 unì sëura che l “fova na urganisazion sucrëta y che tulova ite trueps tl Stat talian”. Tres nrescides ti archifs dl servij sucrët “Servizio per le informazioni e la sicurezza militare SISMI” foven unii al savëi de “Gladio” y de si 622 cumëmbri. De chësc fajova pert culaburadëures dl SISMI, dla urganisazion “Servizio Informazione Difesa-SID”. Chësta fova unida metuda su, do che n ova dat su la urganisazion SIFAR. Pra chësta laurova pea nce la urganisazions neofascistes sciche “Avanguardia Nazionale” y “Ordine Nuovo” y pertes dla rë “Gladio”, coche la “Associazione Protezione Italiani (API)” y l “Movimento italiano Alto-Adige (MIA)”. Nce l cumandant di carabinieres y maltratadëur Marzollo fova leprò. Dal 1960 al 1980 fovel tla Talia nce unì fat atentac y mazà jënt per motifs politics. (Mo ti ani setanta dl secul passà ova cumëmbri dl API y dl MIA fat atentac ala cësa del Sëurastant de Südtirol Silvius Magnago, al monumënt de Andreas Hofer a Maran y a n valgun hotiei). I resultac de Casson fova unii publichei plu tert te “Servizi segreti e il segreto di stato” (“Geheimdienste und Staatssicherheit”, 1992), y n fova ruvei tan inant che na cumiscion de nrescida dl Parlamënt talian se dajova ju cun dut cie che tacova adum cun l “terorism tla Talia”. N ova nsci nce nrescì sun i ani dla bombes te Südtirol. La cumiscion fova ruveda tl 1991 ala contlujion, che “i servijes sucrëc tl Stat se ova mescedà ite tla ativiteies dl BAS” (documentà te: Commissione Parlamentare d’Inchiesta sul Terrorismo in Italia e sulle cause della mancata individuazione dei responsabili delle stragi, 1991, doc. XXII, nr. 52) .

La scuviertes de Casson ova purtà a na crisa de Stat tla Talia. L presidënt dl Cunsëi di Ministri Giulio Andreotti ova detlarà n cont dla nrescida parlamentera, che “Gladio” laurova nce te truep d’autri stac europeics, y cun chësc fovel rot ora n scandal a livel europeich, ulache te de plu Stac fovel unì fat petizions ti parlamënc. Tla Talia, tl Belgio y tla Sbaiz fovel unì metù su cumiscions de nrescida. La “Cumiscion de nrescida terorism y massacres (1994–2000)” dl Senat talian detlarova te si ressumé: “Chisc massacres fova urganisei o sustenii da persones te istituzions dl Stat talian, che fova liedes al servisc sucrët american”. L Parlamënt europeich ova do na descuscion ai 22 de nuvëmber fat na prutesta sciorfa contra la NATO y contra i servijes sucrëc.

La StaSi dla DDR y Südtirol

Nce tla DDR fovel unì metù su trupes “stay-behind”. Tlo ne ti dijoven sambën nia “stay-behind”, ma “Partisanenaufbau”. Respunsabl fova tlo dal 1955 inant Markus Wolf dla “Abteilung zur besonderen Verwendung (AzbV)” dla “Nationalen Volksarmee (NVA)”. Ti ani sessanta fova chësc departimënt, coche bele ti Stac dl vest, nce tla DDR passà dala cumpetënza dl militer sota chëla di servijes sucrëc. Daldò ovel giapà l inuem de “Arbeitsgruppen des Ministers/Sonderaufgaben (AGM/S)” cun trëi bases de sustëni ora per la DDR y fova unì ntegrà, puech dan che l mur de Berlin tumova l ann 1989, tl departimënt zentrel “Abteilung XXII Terrorabwehr”. La ncëria dl AGM/S fova danter l auter chëla de fé atentac cun esplojif – dantaldut tl Deuschland dl Vest, ma nia mé iló. Per i ntervënc scundui ova la “Segurëza de Stat (Staatssicherheit StaSi)”, che fova a cë de chësc departimënt nsenià ju 3.500 persones. Si reprejentant plu aut fova Markus Wolf, suvënz “incognito” a Viena.

Markus Wolf (1989). Cheder: Bundesarchiv [1] (Bild 183-1989-1208-420), Foto: Elke Schöps, lizënza: CC-BY-SA 3.0 [2]

L ie dut mo da nrescì tant che la StaSi dla DDR se ova mescedà ite te Südtriol. Davia che é fat l proiet “Die Stasi und der Südtirol-Konflikt” possi al mumënt, do ti avëi cialà a de plu mapes de documënc tl gran archif dl “Bundesbeauftragten für die Unterlagen des Staatssicherheitsdienstes der ehemaligen Deutschen Demokratischen Republik (BStU)” a Berlin dì chësc: L “Ministerium für Staatssicherheit (MfS)” dla DDR, che fova “la speda y l scude dl partit” y nsci n organ dl partit totaliter “Sozialistische Einheitspartei Deutschlands (SED)” teniva ite avisa la dutrina statela de antifascism (Antifa). Chësc se nteressova per l “Südtirol-cunflit” dantaldut per pudëi desmustré y fé udëi a dut l mond l gran nflus che la forzes dl “revanscism” tudësch dl vest ova.

La informazions sun i fac de Südtirol y l nflus che ova Viena, Dispruch, Bulsan y Roma, univa abinedes adum da infurmadëures sota l cuntrol de ufezieres dla Stasi, da d’autri culaburadëures nia ufiziei y da agënc.

Suvënz univa la “forzes dl revanscism tudësch dl vest” ududes sciche “ultra” de Bonn y te chësc poz univa metui ministri, funzioneres auc di ministeres y dla giustizia y politicri di partic CDU, CSU, SPD, FDP. Contra duc chisc univel fat prupaganda. La diretives per chësta strategia univa dates ora dal Politbüro (1958-1981) y dal cumëmber dl Cunsëi de Stat dla DDR (1976-1981) Albert Norden do la “Nuet di Fuesc dl 1961”, do d’autri atentac dl BAS y do l prozes de Milan contra BAS-ativisć śarei via.

Tl “Politbüro” fova l jurnalist da dant Albert Norden respunsabl per “agitazion” y menova na “cumiscion per ruvé sëura y straufé i delic de viera di nazi”. Te chësc cuntest fovel nce da udëi la prupaganda fata per scredité politicri tudësc dl vest per delic de viera ulache n ova ulù fé crëier che i ëssa abù respunsablteies. Mplu oven ulù fe crëier che dut fova n cumplot pangermanich menà da Bonn y München contra Roma, per desturbé dassënn la relazions danter i doi stac cumëmbri dla NATO y dla EWG.

Per avëi la proes de chësc univel dat ora nutizies fauzes de na cunlaurazion danter forzes nazistes “vedles” y “nueves” [tla prupaganda dla DDR fova “nazist” al medem livel de “fascist”] dl Deutschland dl Vest, Österreich y (Süd-)Tirol cun raion operatif Südtirol (sciche post di cunflic) y duta la Talia dl nord. L ntervënt univa fat da reprejentanc dla StaSi adatei per chësc lëur, sciche nce GM y/o IM che univa nciariei de usservé nazisć “vedli” y “nueves”.,

Da pert dla StaSi univel cris ora persones che messova abiné informazions da de vedli nazisć y de nueves y da reprejentanc di partic danter chisc la “Deutsche Reichspartei” (DRP, 1950-1965), meneda ntlëuta te Deutschland dl Vest da Adolf von Thadden y che fova deventà pona l partit “Nationaldemokratische Partei Deutschlands” (NPD). Te Österreich univa dut chësc fat pra l partit “Nationaldemokratische Partei” (NDP), metù su da Norbert Burger.

Contra chësta persones y chisc partic univel fat na prupaganda per descredité y nfurmé fauz, metan ora che duc fova pangermanisć. Te chësta situazion drët cumplicheda y nia tlera fovel nce ncantëur agënc che laurova per doi o nce per trëi patrons.