Stimà dut. Kapfinger Anton
Sëurastant de raion dla S.V.P. Maran!

La festa de “Andreas Hofer” dla dumënia passeda a Maran fova, per la festa nstëssa cun la mujighes y la cumpanies di scrizri y cun la reprejentazion dl pez sun “Andreas Hofer”, drët mposanta y solena y chësc ie nce unì prijà dai partezipanc. L popul ie nce cun plajëi unì a cunescënza che i doi Vësculi de Südtirol y Nordtirol à metù n ultimatum. Nce chësc à judà pea a ti dé ala festa na mpurtanza particulera.

Nce sce dut chësc à fat gran plajëi, me sënti n duvier de auzé ora na pert negativa de chësta manifestazion. L manciova la populazion. Ie me é cialà ju dut avisa y é messù udëi cun gran mueia che l popul, sce tulon demez la cumpanies di scizeri y i ghesć che ie tlo per cura, manciova defin. N relazion ala gran festa fovel n scandul. Y chi auter à pa n chësc cont la respunsabltà sce no l sëurastant de raion cumpetënt? L fossa stat Vosc duvier de nciarië Vosc reprejentanc di luesc che i se cruzie che la populazion, almanco de Vosc raion, tole pert ala festa. Son unii al savëi che l ne ie unì fat nia n chësc cont. Nce la informazions sun la stampa jiva dl vieres de Vosta cunvinzions. Ne posse nia ruvé a n’autra contlujion che dut chësc fova te Vosc nteres, davia che d’autri avenimënc sotrissea chësc.

Sce ne Ve ëis nia rendù cont dla gran mpurtanza de chësc avenimënt y ne ëis nchina ncuei nia capì cie che “Volkstumskampf” ie, pona possi mé Ve dì che l ie gran ëura che renunzieis ala ncëria de sëurastant de raion, per schivé che dut l raion tome ju a Vosc livel.

Sce nëus südtirolesc ne ruvon nia inant te nosta batalia per la ejistënza, pona per na bona pert, ajache on danter i reprejentanc persones che ne capësc nia la batalia dl popul per la lidëza y l dërt, o ne uel nia la capì.

Sce ne ulëis bele nia fé pea, pona trajëde almanco la cunseguënzes.

Frangart, ai 16/05/1959 sotscrì Sepp Kerschbaumer – Frangart