“Radio Freies Tirol”
Ai 19 e dezëmber 1965 fovel unì dat tres dala cësa dl cumandant di scizeri de Oberperfuß tl Nordtirol la prima trasmiscion dl “Radio Freies Tirol”.
Cun chësc radio univel dat tres informazion sëura dut Tirol per la batalia de lidëza y l univa fat prupaganda, te de plu rujenedes, per l’autodeterminazion de Südtirol.
Cun tëutes de posizion n cont di svilups politics, cunsëies ala populazion, nutizies militeres y sucrëtes ala grupes de ntervënt “BAS”, dajova tres chësta stazion-radio “nia leghela” for inò da nzaul d’auter, suvënz da luesc daujin al cunfin cun Südtirol, per garantì na bona cualità de audida tl raion dl sud.
La stazion-radio y chëi che l ova metuda su ne n’ie mei unic abinei. L ie mé restà ot trasmiscions che fova unides dates tres danter dezëmber 1965 y lugio 1967. Ntan la prima trasmiscion, de dezëmber dl 1965, ova nce rujenà l BAS-ativist Jörg Klotz, che ova purvà de ti dé ite snait ai camerac che fova śarei via tla perjons talianes, ma l ie da dì che l radio ne univa al scumenciamënt nia audì te Südtirol.
N cont dl’adurvanza dla stazion-radio iel unì ora n valguna stories, l possa vester che l fova plu de una na stazion-radio da garat, coche à dat da ntënder de plu testemonesc da ntlëuta.
